ازاى امنعنى عن عشقك

ما تقلقيش....

غير راحتك انتي في الدنيا دي مايهمنيش
و ليكي بس يا قمري ....عمري حاعيش ..
ماتقلقيش.....

ولو شفتي دموع فرحي

لما تيجي عينك في عيني
ماتلومنيش....

معاكي في دقة كل ثانية
وياكي دايماً ....ماتخافيش......


و ازاي أمنعني عن عشقك
يا بنت النيل....

باشوف إله الجمال مِتجسد في روحك الصافية

ولون الفراشات في طُرحِك الزاهية

وباسمع صوت ناي في هَمسِك

و ادفي بضحكتِك في البرد ساعة شروقك
و نلمس سوا قرص الشمس
جوه النيل ساعة الغروب

حابيين عصفورين حاضنين إيد بعض
لعش فوق شَجرة طارحة مروحيين

يطول في الليل هَوانا
و تملا السما نجوم
فرحانة منورالنا

و اتوضي من بحر الحنان
اللي في عنيكي
و اصلي لربي يحميكي

إزاي بس أمنعني عن عشقك

يا نجمة ليلي و واخداني قَمرك
مَكتوبالي من يوم ميلادي
و عَشقاني و أنا قدرِك.

لا تعرف فُرقًة لينا طًريق

ولا نقدر.

دا لو غِبنا عن روحنا ثانية

كأن سَنة من عُمرنا عَدتْ .

بيرجع كل واحد منا

بالشوق و اللهفة متعطر .

حُبِكْ حُب مش عادي

حُبِك جوا جَنايني مخضر .

افتحي شِباك الأمل لبكرة .... علي آخره
اقطفيني من جدور حُزني
و ازرعيني جوه قلبك
اسكن.......
و اعــيـــش .......

دبلت .....و داب واختفي
مني كتير وانتي مش جَنبي .
مستني بَس اشوفك و اقولك
بَـــــــحبِكْ ......
من ورا حِجابك الوَردي .

قوليلي بس إزاي أمنعني عَن عِشقكْ .....